Hebrews 5
1Nia dagi aamua hai mee dabu le e hilihili mai i baahi nia daangada, ga wanga nadau hegau e pono nia daangada ang gi God, e hai nadau wanga dehuia mono tigidaumaha e wwede nia hala digaula i baahi o God. 2Mee e bagege, e de loaa i nia hagadilinga mee e logo, deenei laa mee e manawa balabala i baahi digau manawa hamaaloo mo digau hai hala. 3Idimaa mee e bagege, ana tigidaumaha le e hagalee hai ang gi nia huaidu o nia daangada mo ono huaidu. a 4Deai tangada e bida hilihili ia gi di aamua dela e hai mee ginai tagi aamua hai mee dabu, ma go God hua dela e hilihili tangada e hai tagi aamua hai mee dabu, gadoo be Aaron. b5E hai gadoo be Christ: Christ digi bida hilihili aga ia, bolo ia e hagadabu e hai tangada aamua hai mee dabu. Go God dela ne hilihili aga a mee, ga helekai,
“Goe go dagu Dama daane, dangi nei gei au gu hai Tamana ni oou.” c
6Gei mee gu helekai labelaa i lodo nia gowaa i golo boloo,
“Goe ga hai tangada hai mee dabu, ga hana hua beelaa, gadoo be di ala o Melchizedek.” d 7I lodo di mouli o Jesus nogo i henuailala, gei mee nogo dalodalo gi nua mo ono halidangi gi God, dela e mee di daa ia gi daha mo di made. Idimaa mee manawa hila gi lala ge e donu, God gu longono nia dangidangi a maa. e 8Ma e aha mee Tama ni God, gei mee gu iloo di manawa hagakono mai di hagaduadua. 9Dono madagoaa ne dohu dogomaalia, gei mee gu hai di taamada o di haga mouli dee odi ang gi digau huogodoo ala e daudali a mee. 10God gu haga menege aga a mee belee hai tagi aamua hai mee dabu, i di ala hai mee dabu o Melchizedek.
Hudee hudua gi daha di hagadonu
11Gidaadou belee helekai nia hagadilinga mee e logo i di mee deenei, gei di maa e haingadaa di haga donu adu, idimaa, goodou e buna di donu ginai. 12Di madagoaa gu waalooloo belee hai goodou digau agoago, gei deeai, goodou e hiihai huaigolo gi tangada e aago goodou gi nia agoago matagidagi o nia helekai a God. Goodou belee gai nia meegai hamaaloo, gei goodou e gai hua nia meegai balabala. f 13Tangada dela e miami i nia meegai balabala, la di tama huaigolo, e de iloo di tonu mo di hala. 14Nia meegai hamaaloo le e humalia e gai go digau mmaadua, ala gu wouwou ge gu iloo di dugu geegee di huaidu mo di humalia.
Copyright information for
KPG